Assalamu’alaykuum
Bismillah
PART I
Kimugdan bulan Febraury 07, 1974
Nabuklad in katan sin taynga’ bukul
Mga mahadjana’ ha tiyanggi nahiyul
In pikilan landu susa sabab nabutul
Mga MNLF nakanat nanggiyul-giyul
1
Katan sin MNLF ha gimba’ nag tayakkup
Amura walah naka saddia in daing ha luuk
Subay kunu’ dum na malaum na kup
Ampa in kaibanan nakaingat mahup
Hangkanna in nahinang nila maitung luruk
2
In MNLF nakasud pa tiyanggi nag babaan
Ha Masjid tulay na natipun in katauran
Dugaing in daing ha uttara iban satan sadlupan
Misan iyanun in pasisil tiyanggi kiya pag tupuran
Saddia in baran tulus ikhlas misan unu in kumugdan
3
Amurasa in nalipas wala' nila kiya jagahan
In dampal pa Lambayung kiya lupahan
Amuna in nahinang sin mga Army dan
Daing ha Muhbo' in hinang piyag panaugan
Nag dul baya' sabab sin wayruun kabugaan
4
In katan sin MNLF halaum tiyanggi nag tatanam
Daing sin kup pa sampa kiya laum duman
Awun sinyas amuin piyag hatihan sin katan
Maabut lisag duwa hambuuk tibak kadungugan
Amuna yadtu in nahinang bunu’ ha panag naan
5
In tau ha lawum tiyanggi katan sin naka ingat
Wayruun na pag tug amupaka haluk misan in lipat
Tiyainghugan na’abut lisag duwa awun hambuuk timbak
Amuna in siyunuran sin katan katingug nangularak
Malugay napugna' agad di' mag hungka di’ hika sipat
6
Timagna’ in bunu’ sin lisag duwa lapit adlaw
In mga manusiya’ ha tiyanggi nag sambigaw
Katan sin nakasakap miyaguy na iminut miyanaw
Amuin in pag iyanun misan panyap way naka agaw
Unu’unu na sadja in kiya sakapan nila nagawgaw
7
In paguy sin manusiya’ buku’ sakad landu’ in taud
Awun in pa gimba awun da isab harap nila palaud
In kiya hulugan sin canyon nag mula landu in taud
Damikkian in ha laud amura sabab awun nag ka lu’nud
Mataud in nag kabutas mag tali’anak mag taymanghud
8
Timagna’ in bunu’ sin lapit adlaw jukup lisag duwa
Pangatayan sin manusiya’ maka ulung hansul binasa
In Paguy madtu mari luwal da pamutus in diya’ra
Yaunna in hara pa laud pa kapuan iban pa gimba
Timuklas daing ha pamaybay nila way panyap nara
9
Na’abut bulat mahinaat Helicopter piyalupad nag lumba’lumba
Wayna nag tilik timbak na sin sundalu madtu mari way bidda’
Didtu na mataud nag mula civilian daing ha maas pa bata’bata
In nahinang sin mga tau katan biyaus timbak daing ha baba’
Kiya hulugan hambuuk masuuk pa landing mataud in naka kita'
10
In paguy sin manusiya’ awun pa satan awun pa subangan
Amuin in pag iyanun maka ulung in mga babae anakan
Nag u’urul urul harap pa gimba natutundan tundan
In mga bata’bata sa’ sin siyagit makahansul pangatayan
Sabab nag lamud na in laul, uhaw iban hapdi’hapdian
11
Maka hansul sa pangatayan mga taymanghud bang tumtumun
Sabab mga manusiya’ paguy pa satan labay daing ha Tanjung
Mataud pa in nag mula nasabil sabab sin piya urul ha canyon
Tanda’ tuud sin mga satru’ misan pa civilian dida’ pag piun
Sabab in maksud nila in katan bangsa Tausug asal ubusun
12
Magam gam in mga paguy pa laud iban paka puan
Sabab amura in uhaw iban hapdi’ in tiyang kaan
Halaum pila adlaw daing ba Bangas iban Panggasinan
Awun na Lancha naka agad in katauran harap pa Zamboangan
Misan iyanun wayruun nag mula lappas sila katan
13
In nabinsana' tuud amuin mga paguy pa kagimbahan
Amuin pag iyanun nag lamugay ha canyon di’ ka’abalan
Mataud tuud daing kanila in nag mula kiya manitan
Kiyarulan in mga satru ha bangsa tausug nang hinang hinang
Sabab pikil nila wayruun da kampong nila nakalmud ha civilian
14
Hibalik ku in kissa hibintung magbalik harap pa tiyanggi
Limawig in Naval ha tungud lambayung nag panaug Army
Maka ulung’ulung in civilian strapping nila madtu mari
In kiya gumsanan amuna in paguy harap pa Nalsari
Agad kailu in civilian najawjana di’ mag kajawjari
15
Pagga in in mga Army naka dunggu pa higad natipun
Katan sin civilian maas bata siyaggaw piyapagpun
Di’ maambat in manusiya’ ha Hospital Lambayung
Way pagpi’ hisyu sadja in iyabutan maka ulung’ulung
Hinang nila apis pahigad pahigad sila mga army in ha gihtung
16
In mga army way pagpi’ nanaggaw cibilian way ag
Amu in nahinang nila apis sapantun ka’agi piyag ad
Sasakatan harap pa Landing civilian duwan sipak piya’agad
Hasupaya sila di’ matimbak sin MNLF mahinang sabab
Tanda sin mga Army ha MNLF landu diyadahit diyadamag
17
In manusitya' ha waktu yadtu landu maka ulung' ulung
Mataud in nasabil halaum Tiyanggi pa ma gulung
Damikkian in ha paguyan kugdanan sin canyon
Kalian na sadja kailu di'na mara duun na hilubung
In hipag saput unu'ununa sadja awun nayan tadjung
18
Hilin ku in kissa mag balik pa mga MNLF gagandilan
Isug di' hika sipat amuin pag iyanun usug pipisan
In sundalu ha tiyanggi da pa Landing piya maniyuan
Amuin in pag iyanun di' na maambat in namarihang
Way hali sin Plane mag hakut haul iban sin bugtang
19
Ampa in hi Commander Ibba’ iban tindug niya
Asal awal pa amuna in naka una nag mula
In panaw nila ludlud daing ha umbul duwa
Kiya dahlasan mataud in nasabil daing kanila
Duun na ha masuuk pa Tigbaw in hiyantakan nila
Bukun army in naka timbak malainkan bangsa ta
20
MNLF daing ha Puti' da sambil ba Talibang
Daing ha Maimbung iban sin daing ha Parang
Hulah Liyubluban Gadja,Talipao, Pantaw iban Palan
Daing ha Luuk iban na sin kaibanan binaybayan
Namaniyu in mga bangsa MNLF gagandilan
Hangkan in mga satru waktu yadtu kiya da'lasan
21
Nag dum nag adlaw in pag bunu' agad way hali
Mga MNLF nag lulunsulan pa halaum Tiyanggi
Awun pa daing kanila in naka pikil simud Ceni
In nahinang nag kalang katan nag lami lami
Sabab sin way kitaun pilikula biya' na sin agi
PART II
22
Naabut in bunu’ ha tiyanggi nag dum nag adlaw
In kabayan katan wayruun na tau wayna bahingaw
In patay ha halaum tiyanggi piyag ud na liyangaw
Agad di’ na kasungsungan in bahu’ biya’ na lutaw
Gulung lilu’ haka higad higaran yaun atud nakaw
25
Pagga in pag bunu’ nag tantan pila adlaw na in lugay
Mga satru’ mataud namarihang bukun’ sakad nala’day
Damikkian in mga MNLF iban civilian mataud miyatay
In bunu’ yadtu daran mag dugpak wala’ da himuhupay
Apit na maraug in mga satru’ bang sadja limugay lugay
26
In mga satru’ misan iyanun nag bunu’ kiya sigpitan
Sabab waktu yadtu na in sila’ mataud in namarihang
Bunnal in mga MNLF mataud da isab kiyamanitan
Sumagawa’ bukun biya’ sin satru’ amuin kiya da’lasan
Hangkan in hinang nila siyunug na in mga kabayan
27
In mga kabayan hangkan nila siyunug piya maniyuan
Sabab pag tapukan kunu’ sin mga MNLF gagandilan
In mga satru’ wayruun da pag pikil ha mga civilian
Sabab sin wayra kampong nila masabat pag hallian
Hangkan na in tiyanggi nada’pug tuud way tabangan
28
Kabayan ha Tiyanggi mayta sin sundalo siyunug
Sawkat na way lahasiya’ nila nag huhula’ ha Sug
Sabab sin pangdaaki kanila’ amu yadtu in maksud
Bang awun dapat maas bata’ bipa ubus in Tausug
29
Pagga in bunu’ pila adlaw pila dum na in libayan
Mga MNLF himali hangkan nag widraw in hinang
Nag owi’ na pa subangan pa satan iban sadlupan
Bang sadja nila kiya tatasan laung pilang kajam
Maraud na in satru’ panji puti’ pa taas hisayang
30
Waktu sin mga MNLF gimuwa’ daing ha Tiyanggi
Ampa isab nag nag kuyag in sundalo atawa military
Sabab way kagawahan nila lumunsul madtu mari
Dul baya’ nag ukab sin padjak nanglungkad na kaagi
Bulawan sin tau sug siya’sanda’ naubus nila piyaruli
31
Waktu yadtu mataud naka ingat sin kakahinang
Mga sundalo ra in nag ukab sin tinda & kabayan
Sasuku’ sin kakitaan nila alta’ sin tau kiya uugan
Wayruun natiguma’ iyubus nila tuud liyangpasan
Lamud na in barung & kalis pusaka’ sin kamaasan
32
In bunu’ halaum tiyanggi pila adlaw himupay na
Mataud in civilian mag lud kabuhianan mangusaha
In kiya dugpaan awun hambuuk dakula’ bodega
Iyukaban hiyangkut in kiyarutan asin iban kawa
Amunaman namutapal in manusiya’ ha umbul duwa
33
Ha waktu yadtu di’ ku kalupahan kiya tumtuman ku
Hi Ama’ ini iban sin amaun ku ini simud pa barrio
In gawi manglawag kabuhi ‘anan mami gastu
Awun naka bayta’ sukal iban bugas mataud didtu
Hangkan katan sin civilian mag tuyu tuud madtu
34
Hi Ama’ini iban sin ipag pa barrio sila nakasud
In tagna’ nabi’ hangka karut sukal tiyunga’ na iyutud
Timagad aku ha umbul duwa ha kaibanan limamud
Sabab in mahadjana’ madtu mari yaun landu mataud
Manglawag kabuhianan palaum tiynaggi sumud
35
Hika duwa sin adlaw limud nag balik manglipas
Tawakkal sin mga manusiya’ pa barrio umuntas
Awun bagay hi Ama’ PC hinduan siya mami bugas
Ampa na sila piya guwa’ piya agaran timbak ha taas
Ha bangman sila maguwa pa umbul duwa maka lagtas
36
Lugay sin bunu’ ha tiyanggi himaruk haruk na
In mga civilian mataud na in naka tukad pa gimba
Dum adlaw amuin pag iyanun in katan nag jajaga
Sabab daran biya badji sin canyon way pag pi’ masa
Hangkan in tau ha Lupah Sug waktu yadtu landu’ binasa
37
Simunu’ bunu’ ha gimba na amuna in ha Sigpang
Piyanaw sin MNLF in satru’ piyag tayapkupan
Nag taayun daing ha subangan, satan sadlupan
Amu yadtu in bunu’ mataud nag mula gagandilan
Lamud na didtu nasabil hi Cdr. Al iban hi Hdji Ban
36
Pagga pag bunu’ na’ awun na ha kagimbahan
In tagna’ piyanaw sin satru’ in hula ha Palan
Bunu’ tagna’ in satru’ amuin pag iyanun liyaran
Wala’ limugay nag widraw sila di’ maka sangsang
Sabab iyagpangan sin mga maas natu’ gagandilan
39
Bunu’ hika duwa ha Palan amu yadtu in bunu’ amad
In tanda’ niya tuy rum tuy adlaw in lugay amuin had
Daing ha Anuling in ha’ngutud in duhul ha Langtad
Sapah da in piyad utan katan sin gagandilan timatagad
Piya maniyuan sin MNLF in satru’ pa ma luku’ ligad
40
Hika tuy rum in mga gagandilan katan nag widraw
Minig na sila daing ha Palan amuin nahinang nila posto
Amuna in kaliyu pa subangan sin mga sartru’ sundalo
Amuin pag iyanun in mga civilian maka ulung kailu
Agad di’ na maingat maguy nag dara pamutus in liyulutu
41
In paguy sin tau daing ha Labanus iban Palan
Mataud in natipuun ha Mararang atawa Payukan
Limaus na pa Tandu’ Patung in mga kaibanan
Hula’ sin mag taymanghud Hji Jinnul, Hji Ali, & Hja Anang
Sabab amura in manjari silungan in mga paguy civilian
42
Aha pila adlaw libayan in Marang tilu’ sin canyon
Daing ha Bud Datu, Langtad iban Maimbung
Sabab awun naka bayta hi Cdr. Hji Gadafi yaun
Canyon daing ha Bud Datu, Langtad & Maingbung
Bukun sakad in civilian timatapuk ha bulih Lubbung
Sipais marayaw wala’ kiya hulgugan pa gi’tung
43
Waktu yaddtu maka ulung in civilian nag paguy na isab
Amuin pag iyanun di’na kaingatan madtu mari nasihag
Awun na in pa subangan, pa sadlupan, satan nag sasab
Tiya tamingan na sin kaibanan MNLF miya magad
Hallian hipag samban sin sundalo mamunu’ way-ag
44
Maka ulung sa waktu yadtu in manusiya’ ha kagimbahan
Madtu mari nag lulutu pamutus di’na maingat sin paguyan
Amu in pag iyanun uhaw iban hapdi’ nila kailu tangkaan
Bang abutan na dum mag hanig sin dag halaum gulangan
Matug na maas bata’ in mga paguy amuin hangka baanan
45
Mga manghud in kabayan waktu yadtu’ haka gimbahan
Nag sasaddia fax hole hasaum bay in tau nag hihinang
Bang awun katingug canyon atawa’ mortar kabahunusan
Mag us’us na manaug bay sumud palaum mag ba’an ba’an
Misan biya’diin pa in pasu’ halaum lupa’ sa’ sandalan
46
Awun pasan mga manghud kita bayta’ ha katan latag
Pag katingug sin canyon daing ha katugan limungkahad
Simud pa fax hole mag tali’anak katan nag aagad agad
Amuna in sukud nila kiya tulian harap pa laum lungag
Wala’ na’ukay tiyabunan na nahinang nila liyang lahad
Kalu kasunuan pa in kissa ha taas Insha Allah
Repost from: Abu Ahadani
Posts
No comments:
Post a Comment